Bago pa man umusbong ang lahat sa mundo, aminado naman ako na karamihan sa mga ideya at konseptong nabuo sa kasalukuyan at maging sa mga nagdaang panahon ay nagugat sa kanluran. May mga pagtatangka na baguhin ang mga bagay na parang institusyon na sa lipunan, at dito mismo umusbong ang mga teoryang nagnanais na baguhin ang mga nakasanayan na dahil sa hindi na ito akma sa kasalukuyang panahon. Ilan sa mga ito ay naging napakaradikal na pagbabago ang gustong makamit.

        May teorya na naglalayon na basagin ang tradisyunal na pagkakategorya na ang kasarian ng babae sa mga lalaki at ang iba pang mga kasarian katulad ng mga homosexuals, transgender, at bisexuals na naghahanap ng pagkakakilanlan bilang mga kasarian din ng tao at hindi mga abnormal na kasarian. May teorya naman na humihikayat na buksan ang mga kaisapan ng mga tao laban sa epekto ng midya sa ating lipunan katulad ng Frankfurt School at Birmingham School. May teorya din na lumalayon na baguhin ang mga pananaw ng modernong panahon at isentro ang sarili na siyang layunin ng post-modernong pananaw. At mayroon ding teorya na nagbibigay ng puwersa sa mga minorya katulad ng nilalakad na pag-aaral ng mga Pranses.

        Sa kabuuan, isang malaking misyon ng mga teoryang ito na kwesttyunin ang mga bagay na bumubuo na sa lipunan. Mga konserbatibong bagay na sa karamihan ay parang siya ng tradisyon at tamang paniniwala. Ang hindi sumunod sa nakasanayan ng mga bagay ay matatawag na kakaiba at nagiging dahilan ng mga diskriminasyon at hindi patas na pagtrato.

         Ang mga teoryang kanluranin na ito ay malayang binibigyan tayo ng makabagong kaisipan na maging bukas, liberal, at kritikal sa mga bagay na nakikita ng ating mga mata, sa mga paniniwalang isinubo sa atin ng lipunan, at sa mga tradisyon na syang nakasanayan na. Hindi mali ang sumaway sa daloy ng tubig at panahon. Ang maging iba ay hindi isang pagkakamali, bagkus ito ay ising paraan ng pagtingin sa mundong nagbabago sa paglipas ng panahon. Napapanahon na magbago tayo ng mga pananaw at maging malayang bukas sa mga isyung kinakaharap ng ating lipunan.

        Itinuro ng kultural na marxismo ng Frankfurt School na kung paano ang isang mdiya, bilang isang instrumento ng konsumerismo, ay naglalason sa kaisipan ng mga taong naging mekanikal na ang paraan ng pagiisip. Mukhang sa panahon ngayon, ang kapitalismo ay buhay na buhay pa rin at hindi lang sa larangan ng ekonomiya ito namamalagi. Sa pangaraw-araw na buhay natin, sa ating mga kultural na gawain, napasukan na ito ng kapitalismo. 


         Ang mga tinatawag na culture industry ng mga pangunahinng miyembro ng tanyag na Frankfurt school ay ang mga paraan ng kapitalismo na hubugin ang mga kaisipan ng mga tao na maging uto-uto, sunod-sunuran, mababaw, o kaya hindi nag-iisip. Ang midya ang isang malaking halimbawa kung paano ang isang indibiduwal ay napapailalim sa impluwensya ng kapitalismo at sa huli ay nagiging isang produkto na nito.